Religiaun-Kultura Lao Hamutuk Unidade Sei Metin

MAUBISSE-AVC-Bispo Dioseze Baucau, Dom. Basilio Do Nasimento, hateten akomulasaun ba tradisaun kultura ho religiaun lao hamutuk, signifika katak unidade sarani sira nia sei metin liu tan bainhira parte rua ne’e lao hamutuk.
Lia hirak ne’e hato’o husi Dom Nasimento, ba sarani Maubisse, bainhira inagura uma lisan Laku ne’ebe reprezenta uma lulik Maubisse tomak, Kinta (04/04). Inagurasaun ba uma Laku hodi loke selebrasaun festa cruz jovem antes atu entrega ba sarani parokia Venilale.
Tuir observasaun, A Voz De Cultura, sarani ne’ebe partisipa iha festa selebrasaun ne’e kuaze besik rehun rua resin, sarani sira ho antusiasmu ho laran ksolok hodi simu Dom. Nasimento ho bainaka ne’ebe ba husi fatin dok, espesialmente sarani parokia Venilale.
Antes de uma Laku inagura husi Bispo, ba dala uluk lia nain sira sei simu ho srigala ou lian dadoli, “Aman Nai Bispo ohin loron ida ne’e ita bo’ot hi’it an to’o mai iha ami nia le’et, ami nahe biti, nahe bora simu ho kontenti no simu ho haksolok, iha Maubisse Mauloko sidau lakoda, liman ida la tohar, ain ida la naksalak, leno dalan mai ba fo naroman mai ami, ami sarani Maubisse tuku tur harohan hein ita nia bensaun,” ne’e mak lia dadoli badak ne’ebe hato’o husi lia nain sira ba Dom. Nasimento ho bainaka sira,”.
“Ohin ita hare ho matan husi nakukun ba naroman ne’e ita lao husi ne’ebe oinsa mak naroman ba iha nakukun no oinsa maka naroman ba hasoru nakukun, hodi fo sentidu ba ita hotu, parabens ba imi buka nafatin atu haklean ita nia kultura, kultura Timor li-liu kultura mambae ida ne’e hodi ba oin. Liu husi kultura ita hametin diak liu tan ita nia fiar iha Maromak ida ne’ebe hatudu nia an ba ita husi nia oan Jesus kristu, “tenik Nai Bispo Nasimento.